Edliyyeinfo.az: Hər bir vətəndaşın dövlət orqanlarından məlumat almaq hüququ var. Bu, sadəcə hüquq yox, şəffaf cəmiyyətin təməlidir. Qurumlar informasiya verməkdən imtina etdikdə – bu, artıq qanun pozuntusudur.
1. Hüquqi əsas nədir?
“İnformasiya əldə etmək haqqında” Azərbaycan Respublikasının Qanunu bu hüququ təmin edir.
3-cü maddəyə əsasən, hər bir şəxs dövlət orqanlarından, bələdiyyələrdən və dövlət büdcəsindən maliyyələşən təşkilatlardan informasiya tələb edə bilər.
2. Nələri soruşmaq olar?
Vətəndaş olaraq siz aşağıdakılarla bağlı məlumat istəyə bilərsiniz:
Qurumun strukturu və fəaliyyəti
Büdcə xərcləri və tender nəticələri
İcra olunmuş layihələr
Qərarların hüquqi əsasları
İşə qəbul və vakant yerlər
(Qanun, maddə 10 və 29)
3. Müraciət necə edilir?
İnformasiyanı almaq üçün:
Yazılı və ya elektron sorğu göndərilə bilər
Qurum bu sorğuya 7 iş günü ərzində cavab verməlidir
(Qanun, maddə 24)
Ərizədə: ad-soyad, soruşulan məlumatın dəqiq adı və hansı formada cavab istədiyiniz (kağız və ya elektron) göstərilməlidir.
4. İnformasiyanı verməkdən imtina edildikdə nə etməli?
Əgər cavab verilmirsə və ya imtina cavabı verilirsə, siz:
Məsul şəxsin rəhbərinə şikayət edə bilərsiniz
Ombudsmana müraciət edə bilərsiniz
İnzibati məhkəməyə şikayət edə bilərsiniz
(İnzibati Prosessual Məcəllə, maddə 4 və 20)
Unutmayın:
Dövlətin informasiya vermək öhdəliyi onun məsuliyyətidir, sizin isə haqqınız! Şəffaflıq – hüquqi dövlətin təməl prinsiplərindəndir.
Hazırladı: Jalə Asiman
Edliyyeinfo.az
