Qəza zamanı qarşı tərəf sığortasızdır – kim məsuliyyət daşıyır?

Edliyyeinfo.az olaraq bu dəfə vətəndaşların gündəlik həyatda sıx rastlaşdığı, lakin hüquqi baxımdan çoxlarının məlumatlı olmadığı vacib bir məsələni izah edirik: nəqliyyat qəzası zamanı qarşı tərəf sığorta olunmayıbsa – zərəri kim ödəməlidir?

İcbari sığorta hər kəs üçün məcburidir

Azərbaycanda hər bir avtomobil sahibi “İcbari Zərəri Ödəmə Sığortası” adlanan sığortanı almağa borcludur. Bu sığorta vasitəsilə qəza baş verərsə, qarşı tərəfə vurulan zərəri sığorta şirkəti ödəyir. Amma təəssüf ki, bir çox sürücü bu qaydaya əməl etmir və avtomobilini sığortasız idarə edir.

Qarşı tərəf sığortasızdırsa – birbaşa öz zərərinə görə cavabdehdir

Əgər yol-nəqliyyat hadisəsi zamanı qəzanın səbəbkarı olan şəxs sığortasızdırsa, bu halda qəzanın bütün maddi zərərinə görə özü məsuliyyət daşıyır. Qanunvericiliyə əsasən, zərərçəkmiş tərəf bu şəxsdən zərərin ödənilməsini tələb edə bilər.

Məhkəmə iddiası qaldırıla bilər

Qarşı tərəf könüllü şəkildə zərəri ödəməkdən imtina edərsə, Mülki Məcəllə və Yol Hərəkəti haqqında Qanun əsasında zərərçəkmiş tərəf məhkəməyə müraciət edərək maddi və mənəvi zərərin ödənilməsini tələb edə bilər.

Maddi zərər necə hesablanır?

Maddi zərərin məbləği:

Ekspertiza rəyinə,

Təmir xərclərinin faktiki sənədlərinə,

Qəza anındakı real vəziyyətə əsasən müəyyən olunur.

Qəza nəticəsində xəsarət varsa – cinayət məsuliyyəti də doğura bilər

Əgər qəza nəticəsində insanlar xəsarət alıbsa və ya ölüm baş veribsə, bu zaman məsuliyyət Cinayət Məcəlləsinin müvafiq maddələri ilə qiymətləndirilir. Hətta sığorta olsa belə, bu məsuliyyət dəyişmir. Sığortasız və diqqətsiz sürücülər daha ağır məsuliyyətə cəlb oluna bilər.

Sığortasız avtomobil idarə etmək həm inzibati xəta, həm də baş verə biləcək qəzalar zamanı ciddi maliyyə və hüquqi məsuliyyət yaradır. Əgər siz belə bir hadisə ilə üzləşmisinizsə, hüquqlarınızı bilmək və qorumaq üçün bütün sübutları toplamalı və zəruri hallarda məhkəməyə müraciət etməlisiniz.

Edliyyeinfo.az vətəndaşlara hüquqlarını bilməyi və hər an qanun çərçivəsində davranmağı tövsiyə edir.

Hazırladı:  Tural Kəlbəcərli

Edliyyeinfo.az