Edliyyeinfo.az: İşə qəbul zamanı bir çox hallarda vətəndaşlar qanunsuz sorğulara, ədalətsiz şərtlərə və diskriminasiyaya məruz qalır. Təəssüf ki, bu hallar həm dövlət, həm də özəl müəssisələrdə baş verir və insanlar hüquqlarını bilmədikləri üçün çox zaman susmağa məcbur olurlar.
Əmək Məcəlləsinin 24-cü maddəsinə əsasən, hər kəs əmək münasibətlərində bərabər hüquqlara malikdir və heç kəs cinsinə, yaşına, irqinə, dini mənsubiyyətinə, siyasi baxışlarına və sosial statusuna görə əmək hüququndan məhrum edilə bilməz.
İşəgötürən işə qəbul zamanı yalnız işin icrası ilə birbaşa bağlı olan sənədləri və məlumatları tələb edə bilər. Şəxsi həyat, ailə vəziyyəti, hamiləlik, dini və siyasi baxışlar, əvvəlki iş yerindən “razılıq məktubu” və ya “təqdimat məktubu” tələb etmək – qanunsuzdur.
🟩 Əmək Məcəlləsinin 64-cü maddəsinə görə, işə qəbul üçün namizədlərlə müsabiqə, test və ya müsahibə keçirilə bilər, amma bu prosesin obyektiv və şəffaf olması əsas şərtdir. Namizədin yalnız peşə hazırlığı, bilik və bacarıqları qiymətləndirilməlidir.
🟩 Əmək Məcəlləsinin 79-cu maddəsi işəgötürənin əmək müqaviləsi bağlamadan şəxsi işçi çalışdırmasının yolverilməz olduğunu təsbit edir. Əgər sizdən “gəlin bir neçə ay işləyin, sonra müqavilə bağlayarıq” kimi təkliflərlə istifadə olunursa, bu qanunsuz məşğulluqdur və dərhal Əmək Müfəttişliyi və ya məhkəməyə müraciət edə bilərsiniz.
🟩 Qanunsuz tələblərə misal:
Fotoşəklinizə görə qiymətləndirmə və ya rədd cavabı;
Ailə vəziyyəti və uşaqlarınızla bağlı suallar;
Hamiləliklə bağlı maraqlanmaq və ya işə qəbul etməmək;
Qeydiyyatda olduğunuz ünvana və ya yaşadığınız əraziyə görə ayrı-seçkilik;
“Kişi işidir” və ya “yalnız subay xanım” tələbi ilə vakansiya təqdim etmək.
Bu tələblərin hamısı bərabərlik hüququna və işəgötürənin qanuni səlahiyyətlərinə ziddir.
Əgər belə hallarla qarşılaşırsınızsa, Əmək və Əhalinin Sosial Müdafiəsi Nazirliyinə, Əmək Müfəttişliyi Xidmətinə və ya məhkəməyə müraciət edə bilərsiniz. Əlavə olaraq, vətəndaşlar hüquqlarının pozulması barədə Edliyyeinfo.az redaksiyasına da yaza bilər – belə halların ictimailəşməsi gələcək pozuntuların qarşısını almağa yardımçı olur.
Hazırladı: Jalə Asiman
Edliyyeinfo.az
