Edliyyeinfo.az: Aztəminatlı ailələr çox zaman ünvanlı dövlət sosial yardımı (ÜDSY) üçün müraciət etdikdə “ailə üzvünün adına əmlak var” səbəbilə imtina cavabı alır. Bəs qohumun adına olan əmlak imtina üçün əsas ola bilərmi?
Qanunvericiliyə əsasən, sosial yardımın təyinatı “Ünvanlı dövlət sosial yardımı haqqında” Azərbaycan Respublikası Qanunu və Nazirlər Kabinetinin 05.02.2016-cı il tarixli, 37 nömrəli Qərarı ilə tənzimlənir.
Əsas hüquqi müddəalar:
Qanunun 4-cü maddəsi – Ailənin orta aylıq gəliri yaşayış minimumundan az olmalıdır.
Nazirlər Kabinetinin Qərarı, 2.1-ci bənd – Yardım təyin olunarkən ailənin gəlir mənbələri və mülkiyyətində olan daimi istifadə edilən əmlak nəzərə alınır.
Eyni qərarın 2.2.2-ci bəndi – Əgər müraciət edən ailənin üzvləri tərəfindən müəyyən edilmiş daşınmaz əmlak istifadə olunur, həmin əmlak gəlir mənbəyi kimi dəyərləndirilə bilər.
Bəs qohumun adına olan əmlak necə hesablanır?
Əgər daşınmaz əmlak qohumunuzun adına rəsmiləşdirilib, lakin siz və ailəniz orada yaşamırsınızsa, bu əmlak sizin ailənin gəlir hesablamasına daxil edilməməlidir.
Amma əgər siz o ünvanda daimi qeydiyyatda və faktiki yaşayışdasınızsa, əmlak sizin gəlir və ya mülkiyyət statusunuza daxil edilə bilər.
Vətəndaş nə etməlidir?
1. İmtina məktubunda əsaslandırmanın yazılı şəkildə təqdim edilməsini tələb edin.
2. Əgər səbəb qohum əmlakıdırsa, əmlakın istifadə edilmədiyini təsdiqləyən sənədlərlə yenidən müraciət edin.
3. Qanunsuz imtina hallarında İnzibati Prosessual Məcəllənin 79-cu maddəsinə əsasən şikayət hüququnuz var.
Sadəcə qohumun adına olan daşınmaz əmlakın varlığı təkbaşına sosial yardımdan imtina üçün əsas deyil. Əsas meyar – əmlakın faktiki istifadəsidir.
Ədalətli və hüquqa əsaslanan qərarlar üçün hüququnuzu bilin, şikayət imkanınızı istifadə edin.
Hazırladı: Jalə Asiman
Edliyyeinfo.az
