Edliyyeinfo.az: Hər bir məhkəmə prosesi sübutların təqdim olunması və qiymətləndirilməsi üzərində qurulur. Bəs telefon danışıqları, WhatsApp yazışmaları, SMS və digər rəqəmsal ünsiyyət formaları qanuni sübut sayılırmı?
Azərbaycan Respublikasının Mülki Prosessual Məcəlləsinin 76-cı maddəsinə əsasən, sübutlar tərəflərin hüquqi münasibətlərini təsdiq və ya təkzib edən istənilən məlumat mənbəyi ola bilər. Bu sıraya sənədlər, şahid ifadələri, ekspert rəyləri və audiovizual məlumatlar da daxildir.
Telefon danışıqları və səsyazmaları:
Əgər danışıq qarşı tərəfin razılığı ilə yazılıbsa və bu danışıqların real olduğunu sübut etmək mümkündürsə, məhkəmə onu audiovizual sübut kimi qəbul edə bilər. Lakin gizli şəkildə yazılan danışıqlar, Konstitusiyanın 32-ci maddəsinə (şəxsi həyata hörmət hüququ) zidd olduğundan qanunsuz əldə edilən sübut kimi istisna edilə bilər.
Yazışmalar (WhatsApp, SMS, e-mail və s.):
Elektron yazışmalar hüquqi baxımdan sənəd hesab olunur və tərəflər arasında olan razılaşmaları, xəbərdarlıqları və danışıqları sübut edə bilər. Mülki Prosessual Məcəllənin 80-ci maddəsi sənədli sübutların təqdim olunması qaydasını müəyyən edir və burada kağız və ya elektron formatda təqdim olunan sübutlar nəzərdə tutulur.
Məhkəməyə təqdim olunan yazışmanın orijinallığı və dəyişdirilmədiyi ekspertiza yolu ilə yoxlanıla bilər.
Diqqət yetirin:
Danışıqların qanuni yolla əldə edilməsi əsas şərtdir.
Yazışmaların kimə aid olduğu və məzmunun dəyişdirilmədiyi texniki cəhətdən sübut edilməlidir.
Əgər qarşı tərəf bu yazışmaların saxta olduğunu iddia edərsə, ekspertiza təyin olunması tələb oluna bilər.
Edliyyeinfo.az olaraq vətəndaşlara tövsiyə edirik ki, tərəflər arasında yaranan mübahisələrdə rəqəmsal ünsiyyətin hüquqi sübut kimi istifadə edilə bilməsi üçün danışıqların qanuni qaydada və şəffaf şəkildə aparılmasına önəm versinlər. Əldə etdiyiniz məlumatların məhkəmədə qəbul olunması üçün onların etibarlı, aydın və dəyişdirilməmiş olmasına diqqət yetirin.
Hazırladı: Jalə Asiman
Edliyyeinfo.az
