Fırıldaq nədir və necə baş verir?
Edliyyeinfo.az: Hüquqi dildə “fırıldaqçılıq” və ya dələduzluq — yalan və ya aldatma yolu ilə başqasının əmlakını ələ keçirməkdir. Bu Cinayət Məcəlləsinin 178-ci maddəsi ilə tənzimlənir və belə hallarda şəxs cinayət məsuliyyətinə cəlb olunur.
Son illərdə hüquqi çərçivədə həyata keçirilən fırıldaqlar artıb. Aldadıcı şəxslər hüquqi sənədlərdən, notariusun adından və ya rəsmi prosedurlardan istifadə edərək qarşı tərəfə etibar qazandırmağa çalışırlar.
Ən çox rast gəlinən hallardan bəziləri:
-
Saxta icarə və ya alqı-satqı müqavilələri
-
Başqasına məxsus torpağın/evin sənədlərinin “öz adlarına” olduğunu iddia edərək satış
-
“Notarius təsdiqləyib” deyib, saxta sənəd təqdim etmək
-
Hüquqi xidmət adı altında insanlardan pul alıb yoxa çıxmaq
Bu hallar yalnız mülki deyil, həm də cinayət məsuliyyəti doğurur.
Müqavilə imzalamazdan əvvəl nəyə diqqət etməli?
-
Sənədləri yoxlayın. Əmlakın kimin adına olduğunu Əmlak Komitəsinin rəsmi elektron bazasından (e-emdk.gov.az) yoxlamaq mümkündür.
-
Notarius təsdiqi vacibdir. Əgər biri sizə deyirsə ki, “müqavilə var, amma notariusdan keçməyib”, bu sənəd hüquqi cəhətdən qüvvəsiz ola bilər.
-
Rəsmi hüquqşünas və ya vəkil cəlb edin. Xüsusən əmlak, torpaq, borc, icarə kimi məsələlərdə bir səhv sizi uzunmüddətli məhkəmə proseslərinə sala bilər.
-
Çap olunmuş, möhürlü, şəxsiyyət vəsiqəsi ilə imzalanmış sənədsiz heç nəyə razılıq verməyin. “Güvən əsaslı” anlaşmalar hüquqi deyil.
Aldadıldıqda nə etməli?
Əgər siz dələduzluğun qurbanı olmusunuzsa:
-
Dərhal Daxili İşlər Nazirliyinə və ya prokurorluğa müraciət edin.
-
Mövcud sənədləri, yazışmaları və sübutları təqdim edin.
-
Cinayət Məcəlləsinin 178-ci maddəsi əsasında iş başlanması üçün şikayət ərizəsi yazın.
Əgər sizə saxta sənədlə əmlak satılıbsa və ya sizi aldadıblarsa, hüquq-mühafizə orqanlarının araşdırması ilə cinayət işi qaldırıla bilər. Həmçinin siz mülki qaydada kompensasiya və ziyanın ödənilməsi üçün iddia qaldıra bilərsiniz.
Hazırladı: Jalə Asiman
Edliyyeinfo.az
