Edliyyeinfo.az: Müqaviləsiz işləmək bir çox hallarda məcburiyyətdən yaranır. Lakin əmək müqaviləsi olmasa belə, işçi tamamilə hüquqsuz sayılmır. Qanunvericilik faktiki əmək münasibətlərini müəyyən hallarda tanıyır və işçinin hüquqlarını qorumağa imkan verir.
İlk növbədə, işçi gördüyü işə görə əmək haqqı tələb etmək hüququna malikdir. Əgər işəgötürən ödəniş etməzsə, işçi bunu müxtəlif sübutlarla — yazışmalar, şahid ifadələri və ya digər faktiki dəlillərlə təsdiq edərək hüququnu tələb edə bilər.
Bundan əlavə, işçi faktiki işlədiyini sübut etdiyi halda məhkəmə vasitəsilə əmək münasibətlərinin tanınmasına nail ola bilər. Bu isə əmək haqqı borclarının, kompensasiyaların və digər ödənişlərin alınmasına şərait yaradır.
Həmçinin, işçi müvafiq dövlət orqanlarına müraciət edərək hüquqlarının pozulması ilə bağlı şikayət verə bilər. Bu zaman işəgötürən qanun qarşısında məsuliyyət daşıyır.
Unutmaq olmaz ki, müqaviləsiz işləmək risklidir. Buna görə də işə başlamazdan əvvəl əmək müqaviləsinin bağlanması tələb olunmalı və hüquqlar rəsmi şəkildə təmin edilməlidir.
