Oxucu sualı:
“Salam. Mən həyat yoldaşımla artıq bir ildən çoxdur ayrı yaşayırıq. Boşanmaq istəyirəm, amma o razı deyil. Bu halda mən məhkəməyə müraciət etsəm, boşana bilərəmmi? Həmçinin uşağımız da var, onu kimə verəcəklər?”
Hüquqşünasın cavabı:
Salam. Azərbaycan Respublikası Ailə Məcəlləsinin 19-cu maddəsinə əsasən, əgər həyat yoldaşlarından biri boşanmağa razı deyilsə və ortada azyaşlı uşaq varsa, boşanma yalnız məhkəmə qaydasında mümkündür.
Boşanma mümkündürmü?
Bəli, tərəflərdən biri razı olmasa belə, məhkəmə nikahın davam etdirilməsinin mümkün olub-olmamasını araşdıraraq boşanma haqqında qərar verə bilər. Əgər ər-arvad artıq uzun müddətdir ayrı yaşayırsa və ailə münasibətləri faktiki olaraq bitmişsə, məhkəmə bunu əsas götürərək nikaha xitam verir.
Uşağın kimdə qalması məsələsi necə həll olunur?
Bu məsələ də məhkəmə tərəfindən həll edilir. Ailə Məcəlləsinin 52-ci maddəsinə əsasən, məhkəmə uşağın mənafeyini nəzərə alaraq, onun kimdə qalmasını, digər valideynlə necə ünsiyyətdə olacağını və aliment məsələsini müəyyən edir.
Adətən, uşaq ana ilə qalır, amma bu, avtomatik deyil. Əgər ana uşağa lazımi şərait yarada bilmirsə və ya uşağın mənafeyi üçün atanın yanında qalması daha məqsədəuyğundursa, məhkəmə belə qərar da verə bilər.
Edliyyeinfo.az
