Ailə həyatının başa çatması yalnız emosional deyil, həm də hüquqi baxımdan mühüm nəticələrə səbəb olur. Bu nəticələrdən biri də birgə nikah dövründə əldə edilmiş əmlakın, xüsusilə də ipoteka yolu ilə alınmış mənzilin kimə və necə veriləcəyidir.
Edliyyeinfo.az xəbər verir ki, Azərbaycan Respublikasının Ailə Məcəlləsinə və Mülki Məcəlləsinə əsasən, nikah dövründə əldə edilən əmlak, əgər xüsusi şərtlərlə tərtib edilməyibsə, ümumi birgə mülkiyyət hesab olunur.
İpoteka ilə alınmış mənzil də əgər nikah müddətində alınıbsa və kredit ödənişləri birgə ailə büdcəsindən qarşılanıbsa, bu əmlak da ortaq sayılır.
Edliyyeinfo.az yazır ki, boşanma zamanı belə əmlakların bölünməsi məhkəmə qaydasında aparılır və əsasən tərəflərin maddi vəziyyəti, ipoteka müqaviləsinin şərtləri, ödənişlərin hansı tərəf tərəfindən edildiyi və uşaqların kiminlə qalacağı nəzərə alınır. Bəzi hallarda mənzil bir tərəfin adına rəsmiləşdirilsə də, əgər digər tərəf kreditin ödənilməsində iştirak edibsə, bu onun mülkiyyət hüququnu istisna etmir.
Məhkəmə belə hallarda ya mənzilin satışına və əldə olunan məbləğin bölünməsinə, ya da mənzilin bir tərəfə verilib digər tərəfə kompensasiya ödənməsinə qərar verə bilər. Eyni zamanda, ipoteka krediti hələ tam ödənməyibsə, kreditor bankın razılığı olmadan mənzilin bölünməsi çətinləşə bilər. Ona görə də belə hallarda həm ailə hüququ, həm də mülki hüquq üzrə mütəxəssisdən məsləhət alınması tövsiyə olunur.
